SAVE THE RAVE: Zrugg zum Ursprung – Aber gwaltig!
Wer simmer? Mir sin d’Zapfhähne Sissech 04. Mir sin die, wo d’Muusig immer e Spur z’luut händ, wo’s Bier nie usgoht und wo d’Fasnecht als ei grossi Party fyyre. Und weisch was? Das isch genau guet so!
Was isch passiert?
S’Johr 2025 isch… naja… e «Experimänt» gsi. Mir sin mit emne chliine Wagä unterwägs gsi. S’Feedback? Isch gmischt gsi. Aber vor allem: Es het sich eifach nit noch «Eus» agfühlt. Mir sin kei Chliiwage-Gruppe. Mir sin Zapfhähne! Mir bruuche Platz, mir bruuche Bass und mir bruuche ä Uftritt, wo mer nit cha überseh (und überhöre).
Euses Ziel: Zrugg zum Ursprung! Für d’Fasnecht 2026 git’s kei Kompromiss meh. Mir baue widr e richtig grosse Wagä. Eine wo d’Stroosse vo Sissech zum Beebe bringt. S’Motto isch Programm: SAVE THE RAVE. Mir bringe d’Dorfdisco zrugg uf d’Gass. Meh Bass, meh Liecht und vor allem eins: MEH NÄBEL!
Wieso bruuche mir di?
E grosse Wagä baut sich nit vo elei und dr Näbel isch au nit gratis. Material, Technik, d’Hallemieti – das alles koschtet e Stange Gäld. Wenn du also findsch, dass d’Fasnecht echli meh «Wumms» bruucht, denn bisch du bi uns richtig. Hilf uns, d’Tradition vom gepflegte Eskaliere am Läbe z’halte! Wird e Teil vo de Gschicht, unterstütz euses Projekt und sorg drfür, dass es 2026 wieder heisst: Zapfhahn uf und MEH NÄBEL! Dankä für dini Unterstützig – mir gsehn und höre uns! 🍺🔊