Mir streame üsi letschti Show 2020…
Am 28. Novämber boue mir üsi ganzi Produktion, inklusive Licht, Büni und Bäckdrop ids Bierhübeli Bärn und streame für euch mit mehrerne Kameras die ganzi Show zu euch hei! Kes Publikum vor Ort, aber derfür unbeschränkti Bsuecher DEHEIM vorem Bildschirm!
... wöll so cha ds Jahr ja nid z'änd gah!
I gloube alli heis ghört: 2020 isch für vili Branchene e ABSOLUTI Katastrophe. D’Kulturbranche het leider im Gägesatz zu anderne sit em Ahfang vo der Pandemie niemeh chönne richtig düreschnufe. Das trifft ungloublich vill Lüt i unsäglech villne Brüef, wo mit viel Püetz, Durchhaltewille u Motivation grossi und chlini Events müglech mache.
Leider chani nid für alli us üsere Szene öpis tue, i füehle mi aber verpflichtet wenigstens dene Lüt woni unmittelbar mit ine zäme schaffe und mine treue Fans no ei chliine Liechtblick vorem ändgültige Winterschlaf ds schaffe. Und das geit im Moment nume mit Streaming - und mit eure Hilf!
Choufed es Ticket, understützed üs, mini Band und Crew, und gönned euch wider mal volli 90 Minute Live-Musig
Kultur - i mim Fall Musig - isch nid eifach gratis. Dank der Helvetia Versicherig in Interlake chöi mir das Projekt was d’Fixchoschte aageit risikolos dürefüehre. Si sponsere üs als Presentingpartner die ganzi Technik und Streaming-Infrastruktur. Zäme mit der Unterstützig vom Bierhübeli Bärn isches so überhoupt müglech, das Konzärt i dere Form ds mache.
Mit euem Biitrag hie uf Wemakeit zahlet dir also usschliesslech d’Gage vo Simi, Emmi, Luki, Pim, Stu, Michi, Nicole u mir. Mir teile der erspillti Betrag fair dur 8. Und wer wetti, cha o meh gäh - sigs e freie Betrag, oder me chouft es Ticket fürne Mehrpersone-Hushalt. Mir si öich für jedi Unterstützig dankbar!
Datum: 28. Novämber 2020 Showtime: 20:15
Meh Details, Zuegangsdate etc. gits via Mail öppe 24h vorher.