mir nehmed es neus Album uf, imene richtige Studio
Hoi! Ihr händs scho lang gmerkt: mir sind Hinterwäldler.
I de letschte (bald) 10 Jahr hämmer über 300 Konzert gspielt, es paar Filmli gmacht, es Bühneprogramm erarbeitet und 2 CD´s baschtlet. Die beide CD´s hämer bim Gabriel ufem Estrich ufgnoh, ganz eifach. Vo dene händ ihr insgesamt über 2000 Stück kauft.
Danke vielvielmal!!!
Jetzt schriibemer s Jahr 2026 und CD-Abspielgrät sind rar, die neui Technik isch aspruchsvoller worde (ömel für eus Hinterwäldler) und für konservierti Musig chömemer au fascht kei Gäld meh über (bald kei CD-Verchäuf meh). Und es isch eso, dass vieli eus fröged, öb mer eusi Musig au cha «striimä»? Das würded mir gern möglich mache. Und au es paar Platte wettemer mache - für die ganz iigfleischte Hinterwäldler unter euch!
Us all dene Gründ, wänd mir ines richtigs Studio go ufneh, und das isch imfall huere tüür. Mir macheds einewäg! Wenn aber alli öppis dezue biiträged, chömer eus meh Ziit im Studio leischte und öppis ganz schöns erschaffe.
Drum hilf au du eus Hinterwäldler uf dem Wäg.
Mer fiireds dänn a de Plattetaufi :-D
das machemer alles
- mer händ scho agfange Probeufnahme mache mer losed die immer wieder und losed ane, was no komisch tönt, was mir anders wänd spiele und singe, öb mer würkli zfriede sind mit de Text, öb mer alles au verstaht, öb die Solos gnueg Tönli händ, öb de Bass de Rhythmus guet treit, öb mer nöd immer schnäller werded, öb mers besser mit Metronom ufnehmed (stabiler im Takt) oder ohni (isch mängisch Dynamischer) usw…
- viel meh probe
- eus viel Ziit reserviere und iiplane
- es Kraudfaunding mache
- eusi Instrumänt und alli Tonabnehmer und Mikrofön uf vordermaa bringe
- no meh probe
- is Studio gah
- dört bruchemer pro Song für d Ufnahm mit Overdubs usw. öppe 2-5 Stund für ein Song.
- das tuet denn de Tontechniker oder d Tontechnikeri für eus abmische
- mir losed das denn immer und immer wieder, löhnds verändere, und nomal und nomal.. bis mer alli demit zfriede sind.
- dänn muess öpper all die Songs mastere, das heisst: er oder sie macht, dass die Songs uf allne Grät guet töned und dass alli klanglich zunenand pased.
- dänn bruchts no Föteli und schöni Bildli und Text fürs Plattecover bzw. für d Streamingsiitene.
- das macht dänn viellicht en Grafiker, viellicht machemers au sälber..
- dänn tüemer alles nomal lose, aluege, kontrolliere und vor allem ganz ganz viel drüber diskutiere
- mer träumed devo und schwitzed i de Nacht
- mer äsed nüm so viel
- alles dreit sich nur no um die Ufnahme
- und irgendwänn..
- isch alles gmacht
- dänn organisieremer e «Plattetaufi» und laded eu ii (seit me Riliis??)
- und mer mached es grosses Fäscht und spieled all die Lieder live und ihr chönd sie dänn lose, so oft und wo ihr wänd :-D
und Gäld bruchemer vor allem für..
..es Studio ..en Tontechniker ..en Masterer ..für Grafik ..für Plattene ..fürs Veröffentliche uf allne Plattforme